Қазақстанда FWA технологиясы интернетке қолжетімділікті арттыруда маңызды рөл атқаруда
Елімізде интернет желісін дамыту үшін түрлі заманауи технологиялар енгізілуде. Солардың бірі әрі ең маңыздысы – FWA технологиясы. Бұл шешім Қазақстанның кең аумағы мен күрделі географиялық ерекшеліктерін ескергенде, интернетке қолжетімділікті арттырудың тиімді баламасы ретінде қарастырылуда.
Оптикалық талшықты желілерді ел аумағына толықтай жүргізу – ұзақ уақыт пен үлкен қаржыны қажет ететін күрделі процесс. Кей аймақтарда мұндай инфрақұрылымды құру техникалық тұрғыдан мүмкін де емес. Осындай жағдайда FWA технологиясы интернетті шалғай ауылдарға жеткізіп, қалалардағы желі сапасын арттыруға мүмкіндік береді.
Бұл технологияны қазір көптеген дамыған елдер енгізіп жатыр. Қазақстан да 5G FWA технологиясын коммерциялық деңгейде пайдалануды бастаған мемлекеттердің қатарында. Еуразия өңірінде бұл технологияны Қазақстанмен бірге тек Өзбекстан қолдануда, деп хабарлайды Finprom.kz.
FWA технологиясының арқасында қазақстандықтар орналасқан жеріне қарамастан, жоғары жылдамдықты және сапалы интернетке қосылу мүмкіндігіне ие болып отыр.
