Қарағандыдағы «Террикон алқабы» IT-хабында өткен Демо күнде кәсіпкерлер мен стартаперлер өз жобаларын таныстырып, қаржылай гранттар үшін бақ сынасты.
Алдымен «Инкубатор» бағдарламасының финалистері – идеяны нақты бизнеске айналдырғысы келетін стартаперлер – өз жобаларын ұсынды. Олардың қатарында «YAEM» тобының мүшелері- Егор Лошкарев, Олег Масленников және Артём Захарченко болды. Олар HoReCa сегментіне арналған QR-мәзір жобасын әзірледі, бұл клиенттерге қызмет көрсетудің баяулығы, баспа шығындары және шетелдік қонақтарды қабылдау сияқты бірнеше мәселелерді шешуге бағытталған.
Сондай-ақ, iCompile жобасының авторлары да өз жұмыстарын таныстырды. Жобаның бас директоры Қасымжомарт Шубайдың React Native бойынша 3 жылдық тәжірибесі бар, АҚШ-тағы IB-мектебінде білім алған және соңғы жарты жылда стартаптарды іске қосумен айналысуда. Оның серіктесі – жобаның техникалық директоры Арсен – DOS, Hour of Code ұйымдарының жетекшісі. Олар жас мамандарға бағдарламалауды үйренуге көмектесетін жасанды интеллект негізіндегі компилятор – бағдарламалау тілінде жазылған мәтінді машиналық кодқа аударатын бағдарламаны әзірледі.
«Инкубатор» бағдарламасының тағы бір финалисі – «Лактопроф» жобасының командасы. Анастасия Шмидтке мен Анна Попова емізулі аналарға білікті кеңесшілер мен ақпараттық материалдарға қол жеткізуді ұсынатын емшекпен емізуді ұйымдастыруға арналған мобильді қосымшаны жасады. «Инкубатор» барысында Анастасия мен Анна жобаның сайтын құрып, сату және өнімді дамыту жоспарын әзірлеп, алғашқы сатылымдарды жүзеге асырып, жобаның қажеттілігін растады.
Дәл осы үш жоба – YAEM, iCompile және «Лактопроф» – 500 000 теңге көлеміндегі гранттарға ие болды.
Демокүннің екінші бөлігінде «Акселератор» бағдарламасының түлектері – жұмыс істеп тұрған бизнесті дамытуға арналған бағдарлама – өз жобаларын таныстырды. JolScan, TalkTrack, EatPlay.kz, sidekick, ZANTech.kz және Teleport командалары өз нәтижелерімен бөлісті. Инвестор – Terricon Venture Club бизнес-ангелдер клубы – осы стартаптарға 25 миллион теңге инвестиция салуға дайын екенін мәлімдеді. Жақын арада ұйымдастырушылар қай жобаларға және қандай көлемде инвестиция бөлінетінін жариялайды.
– Біздің бизнес-бағдарламаларымызға қатысқан жобаларға инвестиция салу тәжірибесі біз үшін жаңа емес. Олардың қалай өзгеріп, өсіп жатқанын көріп отырмыз, сондықтан олардың әлеуетіне сенімдіміз және командаларды біліммен ғана емес, қаржылық ресурстармен де қолдауға дайынбыз, – дейді «Террикон алқабының» бас директоры Сабир Ниязов.
