БҰҰ-мен Халықаралық электробайланыс одағы (ITU) «2024 жылғы Ғаламдық киберқауіпсіздік индексі» (GCI) туралы есеп жариялады. Жаңа әдістемеге сәйкес, Қазақстан екінші топқа (Tier 2 – Дамушы) кіріп, 100 мүмкін балдың 94,04 балын жинады.
GCI рейтингі киберқауіпсіздіктің бес негізгі бағытын қамтитын 83 параметр негізінде құрастырылады: құқықтық, техникалық, ұйымдастырушылық аспектілер, әлеуетті дамыту және халықаралық ынтымақтастық. 2024 жылғы есепте елдердің киберқауіпсіздік саласындағы жетістіктерін дәлірек бағалауға мүмкіндік беретін жаңартылған бес деңгейлі талдау қолданылған. Деңгейлерге Tier 1 – Үлгі боларлық (Role-modelling), Tier 2 – Дамушы (Advancing), Tier 3 – Қалыптасушы (Establishing), Tier 4 – Даму үстінде (Evolving) және Tier 5 – Құрылу үстінде (Building) кіреді.
Қазақстан Tier 2 – Дамушы тобына Қытай, Австрия, Канада және Әзербайжан сияқты елдермен бірге кірді. Бағалау процесіне әлемнің 194 елі қатысты. Алдыңғы есепте (2020/2021), ескі әдістеме қолданылған кезде, Қазақстан 31-орынды иеленген болатын.
Жаңа әдістеме аясында еліміз «құқықтық» және «ынтымақтастық» бағыттарында барлық талаптарды орындап, техникалық деңгейдің жеткілікті екенін көрсетті. Алайда, рейтингті одан әрі арттыру үшін ұйымдастырушылық шараларды күшейту, әлеуетті дамыту, сондай-ақ киберқауіпсіздік саласындағы халықаралық ынтымақтастықты нығайту қажет.
Жаңа әдістеме 2023 жылғы жұмыс нәтижелерін бағалайды және индекс әр екі жылда бір рет жаңартылып отырады
