Гонконгтың Bvio Tech компаниясы Kickstarter краудфандинг платформасына Violoop құрылғысын шығарды. Әзірлеушілер оны компьютерге қосылатын жасанды интеллект көмекшісі деп сипаттайды. Құрылғы қосымшалармен жиі жұмыс істейтін, деректерді реттейтін, хат жазатын және есеп дайындайтын адамдарға арналған. Violoop сыртқы пішіні жағынан шағын ретро мониторға ұқсайды. Ол жеке қуат көзіне қосылып, компьютермен HDMI және USB-C порттары арқылы байланысады. Құрылғы ноутбук аккумуляторының қуатын жұмсамайды әрі оның жұмысын баяулатпайды. Экранда жасанды интеллекттің сол сәтте орындап жатқан әрекеті мен оған кеткен уақыт көрсетіледі. Violoop Windows, macOS және Linux операциялық жүйелерімен үйлесімді.
Құрылғының жұмыс істеу тәсілі әдеттегі жасанды интеллект көмекшілерінен өзгеше. Мысалы, ChatGPT-пен жұмыс істегенде пайдаланушы сұрақ қойып, нұсқау алады да, қажетті әрекеттерді өзі орындайды. Ал Violoop жағдайында пайдаланушы тапсырма береді, ал құрылғы компьютердегі көптеген жұмысты өздігінен атқарады. Ол үнемі қосулы тұрып, пайдаланушының жұмыс барысын бақылап, әрекеттерінің ерекшеліктерін үйренеді. Мәселен, хаттарға жауап беру кезінде қолданылатын стиль мен жауап жазу ретін ескереді. Сонымен қатар құрылғы жұмыс істеп жатқан жобалар туралы қажетті мәліметтерді есте сақтайды. Соның арқасында кейде пайдаланушыдан қосымша нұсқау сұрамай-ақ, тиісті әрекеттерді ұсына алады.
Дегенмен, құрылғы қателесуі мүмкін, сондықтан оның жұмысын бақылау қажет. Осы мақсатта Violoop арнайы растау батырмасымен жабдықталған. Пайдаланушы батырманы басып, әрекетті мақұлдамайынша, құрылғы тапсырманы орындай алмайды. Violoop әсіресе көп уақыт алатын, үнемі қайталанатын бірсарынды жұмыстарды жеңілдетуге арналған. Негізінде, бұл компьютердегі көптеген әрекетті адамның тұрақты араласуынсыз орындай алатын шағын компьютер.
Әзірлеушілердің айтуынша, Violoop экрандағы кескіндер мен файлдарды бұлттық қоймаға жібермейді. Экраннан алынған деректер құрылғының өзінде өңделеді. Алайда көлемді жасанды интеллект модельдерін пайдаланған кезде жұмыс контекстінің мәтіндік түйіндемесі бұлттық қызметке жіберілуі мүмкін. Құрылғының тұрақты жады 128 ГБ құрайды. Оны пайдалану үшін жазылым рәсімдеудің қажеті жоқ.
Kickstarter платформасында науқанның бастапқы кезеңінде құрылғыға тапсырыс берушілер үшін баға 399 доллар болып белгіленген. Кейін оның құны 699 долларға дейін көтеріледі. Қаржы жинау науқаны сәтті аяқталған жағдайда, құрылғыны жеткізу қараша айында басталады деп жоспарланған.
Дереккөз: Violoop.
Айта кетейік, қосымша материалдар мен сараптамалық шолуларды біздің Telegram арнамыздан оқуға болады.
