Meteoric стартапы қалың бұлттан арылудың өзгеше тәсілін ұсынып отыр. Компания ондаған, тіпті жүздеген дронды бұлт қабатына жіберіп, оларды күн электр станцияларының үстінде сейілтуді көздейді.
Жоба аясында ондаған немесе жүздеген автономды аппаратты 5000 метрге дейінгі биіктіктегі төменгі және орта бұлт қабаттарына жіберу жоспарланған. Дрондар химиялық реагенттерді қолданбай, бұлт құрамындағы су тамшыларына әсер етуі тиіс. Мұндай ықпал бұлттардың күн сәулесін кері шағылыстыру қабілетін төмендетіп, жердегі күн панельдеріне түсетін жарық мөлшерін арттырады.
Төмен және орта деңгейдегі тұтас бұлт жамылғысы күн сәулесінің 82 пайызына дейінгі бөлігін бөгей алады. Модельдеу нәтижесі дрондарды пайдалану АҚШ-тың электр желісі маңызды өңірлеріндегі қолданыстағы күн электр станцияларының энергия өндіру көлемін 10–30 пайызға арттыруы мүмкін екенін көрсетті. Ақшалай есептегенде, бұл орнатылған қуаттың әр мегаваттына шаққанда 5–28 мың доллар қосымша кіріс әкелуі мүмкін. Оның үстіне, жаңа инфрақұрылым салудың қажеті жоқ.
Компания бұлттарды сейілтудің нақты тетігін әзірге ашып отырған жоқ. Белгілі болғаны, зертханалық сынақ кезінде дронның прототипі жасанды бұлттың тығыздығын 13 пайызға азайтқан. Алайда тәжірибе жүргізілген камераның көлемі, өлшеу әдістемесі мен сынақтардың қанша рет қайталанғаны туралы ақпарат жарияланбаған. Тәуелсіз сараптама нәтижелері де көрсетілмеген. Сол сияқты энергия өндіру көлемін 10–30 пайызға арттыру туралы көрсеткіштер нақты жұмыс істеп тұрған электр станциясында жүргізілген өлшемдерге емес, есептеулерге негізделген.
Сынға жауап ретінде Meteoric экономикалық тиімділікке назар аударады. Компанияның мәліметінше, бұлттарды ұшақпен сейілту жұмыстарының бір сағаты шамамен 2000 доллар тұрады, ал электрлі дрондардың бір сағат жұмыс істеу құны 60 доллардан аспайды. Ендігі негізгі міндет – жүйенің зертхана жағдайындағы жасанды бұлтта ғана емес, табиғи бұлт қабатында да тиімді жұмыс істей алатынын дәлелдеу.
Дереккөз: Meteoric Technologies Inc.
Қосымша материалдар мен сараптамалық шолуларды біздің Telegram арнамыздан оқуға болады.
