Ақмола облысында еліміздің түкпір-түкпірінен келген әзірлеушілерді, инженерлерді, әскери қызметшілерді және жоғары оқу орындарының студенттерін бір алаңға жинаған SHAIQAS 2026 әскери-инженерлік чемпионаты өтті.
Чемпионаттың финалында қазақстандық жоғары оқу орындарының студенттерінен құралған командалар ерекше көзге түсті. Олар өздерінің IT және инженерлік жобаларын таныстырды. Жас мамандар техникалық даярлық деңгейін көрсетіп қана қоймай, алған білімін нақты міндеттерді шешуде қолдана алатынын да дәлелдеуге мүмкіндік алды.
Биыл чемпионатқа еліміздің әр өңірінен 100-ден астам команда өтінім берген. Іріктеу нәтижесінде үздік 20 команда финалға жолдама алып, өз жобаларын таныстырды және әскери полигонда тікелей практикалық сынақтан өтті.
Финалға Nazarbayev University, Л.Н. Гумилев атындағы Еуразия ұлттық университеті, Қ.И. Сәтбаев атындағы Қазақ ұлттық техникалық зерттеу университеті, Ғұмарбек Дәукеев атындағы Алматы энергетика және байланыс университеті, Woosong University Kazakhstan, ALT University, SDU University және басқа да жоғары оқу орындарының студенттік командалары қатысты.
Студенттер робототехника, ұшқышсыз әуе аппараттары, автономды жерүсті платформалары, бағдарламалау, цифрлық технологиялар және киберқауіпсіздік бағыттарындағы әзірлемелерін көрсетті. Ұсынылған шешімдердің қатарында мобильді роботтандырылған платформалар, қауіпті аймақтардан адамдарды эвакуациялауға арналған технологиялар, әртүрлі мақсатта қолданылатын ұшқышсыз әуе аппараттары және басқа да инженерлік жобалар болды.
SHAIQAS 2026 чемпионатының маңызды ерекшеліктерінің бірі студенттерге өз әзірлемелерін зертхана мен оқу полигонынан тыс жерде, нақты қолдану жағдайына барынша жақын ортада сынауға мүмкіндік беруі болды. Қатысушылар әуе және жерүсті ұшқышсыз жүйелер, киберқауіпсіздік және тактикалық даярлық бағыттары бойынша сынға түсіп, өз шешімдерінің сенімділігін, функционалдық мүмкіндіктерін және тиімділігін тексерді.
Студенттер үшін чемпионатқа қатысу жобаны әзірлеу мен бағдарламалаудан бастап, дайын шешімді нақты жағдайға жақын ортада сынауға дейінгі инженерлік жұмыстың толық кезеңінен өтуге мүмкіндік берді. Сонымен қатар командалар әскери, өнеркәсіптік және технологиялық салалардың өкілдерімен тәжірибе алмасып, кәсіби пікір алып, өз жобаларын одан әрі дамыту мүмкіндіктерін бағалады.
SHAIQAS 2026 студенттердің идеяларын тәжірибе жүзінде сынауға мүмкіндік берген алаңға айналды. Мұнда прототиптер мен бағдарламалық шешімдер нақты жағдайға жақын ортада тексерілді. Мұндай формат жастардың инженерлік ойлау қабілетін, кәсіпкерлік көзқарасын және технологиялық құзыреттерін дамытуға, сондай-ақ жоғары оқу орындары, мемлекет, қорғаныс саласы мен өнеркәсіп арасындағы байланысты нығайтуға ықпал етеді.
Қосымша материалдар мен сараптамалық шолуларды біздің Telegram арнамыздан оқуға болады.
