Австралиялық компания Фарнборо халықаралық әуе көрмесінде спутниктік сигнал жоғалған жағдайда GPS жүйесін алмастыруға арналған бірегей кванттық навигация жүйесін таныстыруға дайындалып жатыр. Кванттық сенсорлар негізінде әзірленген бұл технология ұшуға жарамдылық талаптарына сәйкес сертификаттаудан өткен. Сонымен қатар ол теңіз, әуе және құрлық платформаларында жүргізілген далалық сынақтардан сәтті өтіп, әлемде алғаш болып ұшу қауіпсіздігіне қойылатын RTCA DO-160 халықаралық стандартының талаптарына толық сәйкес келетінін растады.
GPS жүйесіне тәуелсіз жұмыс істейтін бұл технология автономды платформалар мен әуе кемелерінің бағыт-бағдарын дәл айқындауға мүмкіндік беріп, түрлі сыртқы кедергілердің әсерін едәуір төмендетеді. Оның жұмыс істеу қағидасы магниттік картография әдісін пайдаланатын кванттық сенсорларға негізделген. Арнайы алгоритмдер магнит өрісінің өлшенген мәндерін құрылғы жадында сақталған магниттік карталардағы деректермен үздіксіз салыстырып отырады. Соның нәтижесінде құрылғы ешқандай сыртқы сигналға сүйенбей-ақ өзінің орналасқан орнын жоғары дәлдікпен анықтай алады. Бұл тәсіл инерциялық бағдарлау жүйелерінде уақыт өте келе жиналатын өлшеу қателіктерін азайтып, координаттарды тұрақты әрі дәл айқындауға мүмкіндік береді.
Сынақ барысында құрылғы қатаң техникалық талаптарға толық сәйкес келетінін дәлелдеді. Тестілеу ұшуларының 95 пайызы барысында орналасқан орнын анықтау дәлдігі теңіз милінің үштен бірінен аспады. Бұл көрсеткіш салада қабылданған негізгі талаптарға толық сай келеді және жүйені коммерциялық мақсатта пайдалануға мүмкіндік береді.
Компания бұл технологияның бірнеше нұсқасын әзірлеген. Соның ішінде салмағы 1000 грамнан аспайтын ықшам үлгісі ұшқышсыз ұшу аппараттарында қолдануға лайықталған. Қазіргі уақытта технологияны әуе кемелерін өндірушілер, қорғаныс өнеркәсібі кәсіпорындары және сенімді навигациялық шешімдерге мүдделі мемлекеттік ұйымдар бірлесіп бағалау кезеңінен өткізіп жатыр.
Қосымша материалдар мен сараптамалық шолуларды біздің Telegram арнамыздан оқуға болады.
