16 наурыз күні Capcom компаниясы Resident Evil Requiem ойынының сатылымы 6 миллион данаға жеткенін ресми түрде мәлімдеді.
Хоррор жанрындағы жоба 27 ақпанда дербес компьютер, PlayStation 5, Xbox Series X|S және Nintendo Switch 2 платформаларында жарық көрді. Екі аптадан сәл ғана асатын мерзімде мұндай нәтижеге қол жеткізуі оны Resident Evil сериясындағы ең жылдам таралған ойынға айналдырды.
Ойын ресми түрде шықпай тұрып-ақ цифрлық дүкендердегі ең көп күтілген жобалардың бірі ретінде алдыңғы қатардан көрінді. Әрбір таныстырылымнан кейін ойыншылар тарапынан жоғары бағаланып, қызығушылық тұрақты түрде артып отырды.
Жоба екі негізгі кейіпкердің төңірегінде өрбиді — Грейс Эшкрофт пен Леон Кеннеди. Грейс арқылы ойыншы шектеулі мүмкіндіктер жағдайында сақтықпен әрекет етуді талап ететін дәстүрлі қорқыныш атмосферасына енеді. Ал Леонның желісі қарқынды қимылға, қару мен оқ-дәрінің молдығына негізделген серпінді ойын үдерісімен ерекшеленеді.
Оқиға 2026 жылы өрбиді. АҚШ-тың федералдық тергеу қызметінде жұмыс істейтін жас маман Грейс Эшкрофт Раккун-Ситиге байланысты жұмбақ өлімдерді анықтау үшін арнайы тапсырмамен жіберіледі. Ал тәжірибелі кейіпкер Леон Кеннеди биологиялық қауіп-қатерлерге қарсы күресті жалғастырып келеді. Сюжет Раккун-Ситидегі құпия оқиғаларға, Т-вирусқа жүргізілген тәжірибелерге және астыртын әрекеттерге қарсы текетіреске құрылған.
Ойын барысында екі кейіпкердің геймплей ырғағы мен ерекшелігі айқын ажыратылады. Грейс бейнесі бірінші жақтан ұсынылып, ойыншыны оқиға ішіне терең енгізеді және қорқыныш әсерін күшейтеді.
Геймплейде жасырыну, белгісіздік пен психологиялық қысым басым. Грейс жаңа қарсылас күштеп әкелген медициналық кешенді зерттейді. Оның басты мақсаты — үш асыл тастың көмегімен ашылатын есік арқылы қашып шығу. Ойыншы көп деңгейлі ғимаратты біртіндеп зерттеп, әрбір қауіптен сақтанып, күрделі логикалық тапсырмаларды шешу арқылы жаңа бөлмелерді ашады. Бұл бөлім ойынның ең шиеленісті тұсы ретінде ерекшеленеді.
Айналадағы әлсіз дыбыстар, еденнің сықыры, алыстан естілетін белгісіз үндер және қою қараңғылық жалпы атмосфераны ауырлата түседі. Жарық көзі ретінде тек әлсіз жанған шақпақ пайдаланылады. Грейс мемлекеттік қызметкер болғанымен, тәжірибелі жауынгер емес. Сондықтан ол жаһандық қауіп-қатермен бетпе-бет келгенде әлсіз әрі қорғансыз кейіпкер ретінде көрінеді.
Ал Леонның желісі үшінші жақтан ұсынылып, ойын қарқыны едәуір күшейеді. Мұнда әрекетке негізделген тәсіл алдыңғы орынға шығады. Кейіпкер қарсыласты тез жойып, түрлі тәсілдермен шабуыл жасай алатын тәжірибелі күрескер ретінде сипатталады. 50 жастағы Кеннеди сабырлы, батыл әрі сенімді тұлға ретінде көрініс табады. Бұл қасиеттері Грейстің үрейлі мінезімен салыстырғанда айқын байқалады.
Сонымен қатар Resident Evil Requiem техникалық және көркемдік тұрғыдан жоғары деңгейде жүзеге асқан. Көрініс құру тәсілі, кейіпкерлер қозғалысы, бейне сапасы мен дыбыстық шешімдер біртұтас үйлесім тапқан. Ойын қозғалтқышында жарық пен шағылысуды табиғи түрде бейнелейтін жаңа технология алғаш рет қолданылған. Алайда бұл мүмкіндік тек белгілі бір графикалық құрылғыларда ғана қолжетімді.
Саладағы бейресми деректерге қарағанда, компания алдағы уақытта серияның бұрынғы бөліктерін жаңғыртып, жаңа толыққанды жалғасын әзірлеуді жоспарлап отыр.
