Америкалық Ecoute Audio компаниясы танымал TH1 моделінің жалғасы саналатын жаңа Ecoute TH2 құлаққаптарын ұсынды. 2023 жылы шыққан алдыңғы нұсқа үлкен сұранысқа ие болған еді. Жаңа нұсқада дыбыс сапасы айтарлықтай жетілдіріліп, тыңдау әсерін мейлінше жоғары деңгейге көтереді.
Инженерлер мұндай нәтижеге Korg Nutube 6P1 электронды вакуумды триодқа негізделген алдын ала күшейткішті қолдану арқылы қол жеткізген. Бұл технологияның ерекшелігін көрсету үшін құлаққаптың жұмсақ құлақ жастықшаларына арнайы жарықтандырылған шағын терезелер орналастырылған.
Электронды вакуумды триодқа негізделген алдын ала күшейткіш дыбыстың табиғи реңкін сақтап, оған жұмсақтық пен тереңдік береді. Мұндай тәсіл жоғары деңгейлі аудиожүйелерде жиі қолданылады және дыбыстың табиғи әрі қанық естілуін қамтамасыз етеді. Дыбыс сигналын күшейту міндетін екі дербес A/B санатындағы күшейткіш атқарады. Ал сигналды өңдеуді 40 миллиметрлік титанды қаптамасы бар драйверлерді басқаратын 32 биттік цифрлық-аналогтық түрлендіргіш (DAC) жүзеге асырады. Бұл жүйе 384 кГц жиіліктегі сигналдарды қолдайды.
Құрылғыда 32 бит / 384 кГц дәлдікпен жұмыс істейтін цифрлық-аналогтық түрлендіргіш қолданылған. Мұндай мүмкіндік дыбыс сигналын жоғары нақтылықпен ашуға жағдай жасайды. Екі тәуелсіз есептеу өзегінен тұратын архитектура және әр дыбыс арнасына арналған жеке триод стереоарналардың өзара араласпай, барынша айқын бөлінуіне мүмкіндік береді. Ал дыбыс параметрлерін пайдаланушының талғамына бейімдеу үшін мобильді қосымшада сегіз жолақты эквалайзер қарастырылған.
Дыбыс сапасын ерекше бағалайтын пайдаланушылар үшін құлаққапты 3,5 мм аудио ұясы немесе USB-C арқылы сымды түрде қосып, жоғалтусыз цифрлық дыбысты тыңдау мүмкіндігі бар. Сымсыз режимде Bluetooth 5.3 технологиясы қолданылады. Ол LDAC, AAC және SBC жоғары ажыратымды кодектерін қолдайды, сондықтан кез келген жағдайда дыбыс сапасы жоғары деңгейде сақталады.
Құрылғыдағы 1600 мА·сағ сыйымдылықтағы аккумулятор толық қуатталған кезде құлаққаптың 20 сағаттан астам үздіксіз жұмыс істеуіне мүмкіндік береді.
