Жасанды интеллект саласында жаңа мүмкіндіктер күн сайын кеңейіп келеді. Соның бір мысалы — xAI компаниясы әзірлеген Grok моделінің жаңартылған нұсқасы. Grok 4.20 көпшілік назарын қайтадан өзіне аударды. @testerlabor атты қолданушы әлеуметтік желіде модельдің мүмкіндігін көрсетіп, небәрі қысқа мәтіндік сұраныс арқылы бірнеше секунд ішінде Flappy Bird стиліндегі толыққанды ойын жасап шығарғанын жариялады. Автордың айтуынша, бұл нәтижеге Grok Agents деп аталатын ішкі модульдер ықпал еткен. Аталған жүйе тапсырмаларды қатар орындап, код жазу үдерісін айтарлықтай жеделдетеді.
Ұсынылған ойын браузерде іске қосылады. Бағдарламаның құрылымында кедергілерден өтуге негізделген динамикалық қозғалыс, секіру әрекетіне құрылған басқару механизмі, ұпайларды есептеу жүйесі және Flappy Bird ойынына тән классикалық геймплей элементтері толық қамтылған.
Бұл жарияланым қысқа уақыт ішінде әлеуметтік желіде кең тарады. Жазба шамамен мыңға жуық ұнату белгісін жинап, жүз сексеннен астам рет қайта бөлісілді. Постты Илон Масктың өзі де жеке парақшасында бөліскен.
Бұған дейін миллиардер Grok жүйесі 2026 жылға қарай толыққанды бейнеойындар жасауға мүмкіндік береді деп мәлімдеген болатын.
Сонымен қатар Grok жүйесіне қатысты тағы бір маңызды мәселе халықаралық деңгейде талқыланып жатыр. Ирландияның Деректерді қорғау жөніндегі комиссиясы Илон Маскқа тиесілі X әлеуметтік желісіне қатысты ресми тергеу басталғанын хабарлады. Мұндай шешімге Grok жасанды интеллект чат-ботының шынайы адамдар бейнесін пайдаланып, жыныстық сипаттағы суреттер жасай алатыны туралы ақпараттар себеп болған.
Техкульт.
