Қазақстан Республикасының Премьер-министрі Олжас Бектенов жаңа Конституция жобасын халыққа жан-жақты түсіндіру мәселесіне арналған кеңес өткізді. Жиынға Үкімет мүшелері мен өңір әкімдері қатысып, құжаттың мазмұнын қоғамға кеңінен әрі жүйелі жеткізу жолдары талқыланды.
Кеңес барысында Премьер-министр барлық деңгейдегі министрліктер мен әкімдіктерге жаңа Конституция жобасын азаматтарға жан-жақты әрі түсінікті түрде түсіндіру жұмыстарын күшейтуді тапсырды. Бұл бағытта ақпараттық-түсіндіру шараларын жүйелі ұйымдастыру, әрбір тұрғынның құжат мазмұнын дұрыс қабылдауына жағдай жасау басты міндет ретінде белгіленді.
Сонымен қатар, жалған ақпарат пен әдейі таратылатын жалған ақпаратқа қарсы күреске айрықша назар аударылды. Әлеуметтік желілер мен түрлі мессенджерлерде шындыққа жанаспайтын, арандатушылық сипаттағы жарияланымдардың жиілеп кеткені атап өтілді. Осыған байланысты Ішкі істер министрлігіне заң талаптарын қатаң сақтай отырып, жалған мәлімет таратқан тұлғаларға құқықтық тұрғыда жедел әрі қатаң шара қолдану тапсырылды. Бұл жұмыс заң мен тәртіп қағидатын берік ұстана отырып жүргізілуге тиіс.
Аталған бағыттағы жалпы үйлестіру Қазақстан Республикасы Премьер-министрінің орынбасары, Мәдениет және ақпарат министрі Аида Балаеваға жүктелді.
