Карнеги–Меллон университетінің робототехника саласындағы инженерлері Адитья Шрипада мен Абхишек Уорриер өздігінен қозғалатын роботтандырылған платформаның мүлде жаңа үлгісін жасап шығарды. Бұл жоба әйгілі «Интерстеллар» кинотуындысындағы TARS роботының өмірдегі нақты көрінісіндей әсер қалдырады. Жұмыс істейтін прототип Сеул қаласында өткен IEEE RAS Humanoids Conference атты 24-ші халықаралық конференцияда жоғары бағаланды.
TARS3D тік орналасқан, жалпақ төртбұрыш пішінді құрылғы ретінде жасалған. Оның ені 25 сантиметр, салмағы 990 грамм. Робот бір-бірінен тәуелсіз қозғала алатын, телескопиялық тіректермен жабдықталған төрт бөлек секциядан тұрады. Бұл секциялар өзара ерекше тәсілмен біріктірілгендіктен, әрқайсысы көршілес бөліктерден тәуелсіз әрекет ете алады. Бірінші және үшінші секциялар алға жылжығанда немесе екінші мен төртінші бөліктер артқа шегінгенде, робот Х әрпіне ұқсас қалыпқа енеді. Осылайша созылған бөліктер қайта тартылып, құрылғының қадамдап қозғалуына мүмкіндік береді.
Конструкциядағы әр секцияның үстіңгі және астыңғы бөлігінде жартылай дөңгелек тіректер бар. Олар беткеймен жанасуды күшейтіп қана қоймай, айналу арқылы қозғалу мүмкіндігін де қамтамасыз етеді. Робот секцияларын кеңейтіп, бұрышты дөңгелек пішінге еніп, салыстырмалы түрде кедір-бұдырлы жерлермен де домалап өте алады. Соның нәтижесінде ол бірде жүріп, бірде домалап қозғалуға қабілетті әмбебап платформаға айналады, түрлі тосқауылдардан еркін асып өте алады.
TARS3D-тің басты ерекшелігі, кинотуындыдағы баламасы секілді, өз құрылымын жағдайға қарай өзгертіп, нақты міндеттерге бейімдей алуында. Бұл үшін робот арнайы жасанды интеллект жүйесімен жабдықталған. Ол қоршаған ортаны талдап, ең қолайлы қозғалу тәсілін таңдайды. Жобаның авторлары роботтың кеңістікте бағдарланып, қозғалысты қалай үйлестіретіні жөнінде, маневрлік пен жылдамдықты ұштастыру қағидаларын қамтыған арнайы еңбек жазған. Мамандар мұндай тұжырымдама болашақта роботтардың жаңа буынын жасауға негіз болуы мүмкін екенін жоққа шығармайды.
