Қазақстан Республикасының жасанды интеллект және цифрлық даму министрлігі Мемлекет басшысының тапсырмаларына сәйкес цифрлық және жасанды интеллект саласына кадр даярлау жөніндегі жұмыстарды жариялады. Осы мақсатта бес жылдық бағдарлама жасалып, оған ЖИ мен цифрлық технологиялардың негізгі дағдыларын үйрету көзделген.
2025 жылғы қорытынды бойынша, бір жылдан аз уақытта 900 мыңнан астам азамат оқытудан өтіп, жасанды интеллектті қолдану және цифрлық қызметтерді пайдалану бойынша негізгі және қолданбалы дағдыларға ие болды, деп хабарлады министрліктің баспасөз қызметі.
Азаматтардың қызығушылығы бағдарламаның өзектілігін растайды. Оқу процесі күнделікті ЖИ қолдану мен цифрлық сервис қызметтерінен бастап, IT-мамандарын даярлауға және ұйымдардағы ЖИ-ны енгізуге дейінгі практикалық сценарийлерге негізделген.
«Біздің мақсатымыз – ЖИ дағдыларын баршаға қолжетімді ету: мектеп оқушыларынан бастап студенттер, мұғалімдер, мемлекеттік қызметкерлер мен компания қызметкерлеріне дейін. Нәтижелер көрсетіп отыр: адамдар белсенді түрде оқып, ЖИ-ны тәжірибеде қолдануға дайын. Біз бағдарламаны әрі қарай кеңейтіп, технологияларды қауіпсіз әрі тиімді пайдалану бағытында жұмыс жасаймыз», – деді министрліктегілер.
Бағдарлама бірнеше бағытты қамтиды: ЖИ-ны кеңінен үйрету, IT-кадрларды даярлау, мемлекеттік аппарат қызметкерлерінің біліктілігін арттыру, мұғалімдерді қолдау, жасөспірімдерді тарту, сондай-ақ компанияларда ЖИ енгізу.
Негізгі бағыттар
1) IT-кадрларды және мамандарды даярлау
Tech Orda – сұранысқа ие IT-мамандарын даярлайтын бағдарлама. Бір студентке оқу құнының бір бөлігін немесе толық өтемақысын 500 мың теңгеге дейін қамтамасыз етеді. Бағдарламаның іске асырылуы кезінде 9 мыңнан астам студент дайындалды. 2025 жылы 34 мыңнан астам өтініш түсті, іріктеуден кейін 2 600 қатысушы оқуға кірісті.
Tomorrow School – Қазақстандағы алғашқы peer-to-peer моделіндегі ЖИ мектебі. Мұнда дәстүрлі лекциялар жоқ, оқу командалық жұмыс пен өзара көмек арқылы жүргізіледі. 9 іріктеу кезеңі өткізілді, жалпы 17 879 өтініш түсті. Қазір Қазақстан, АҚШ, Ресей, Өзбекстан және Әзірбайжаннан 350-ден астам студент оқуда. Оқу 18 айға созылады, студенттер 50-ден астам жобаны орындайды және 20-ға дейін бағдарламалау тілін меңгереді.
3) Университеттер мен студенттер: ЖИ дағдылары және стартап ойлау
AI Sana – Ғылым және жоғары білім министрлігінің бағдарламасы. Бағдарлама қолданбалы ЖИ дағдыларын дамытуға және стартап-компетенцияларды қалыптастыруға бағытталған. Бағдарламаның нәтижесінде 650 мыңнан астам студент сертификат алды.
4) Мемлекеттік басқару: ЖИ арқылы тиімділікті арттыру
AI Qyzmet – мемлекеттік қызметкерлерге арналған бағдарлама. Ол ЖИ-ны күнделікті жұмыста қолданудың негізгі сценарийлерін қамтиды: ақпаратты өңдеу, жоспарлау, презентация дайындау, тапсырмаларды автоматтандыру, басқарушылық шешімдер қабылдауға көмек көрсету. 50 мыңнан астам мемлекеттік қызметкер оқытудан өтті.
5) ЖИ оқу құралы ретінде. Бағдарламаның жеке бағыты білім беру жүйесін қолдауға арналған. Шамамен 300 мың мұғалім оқытудан өтіп, ЖИ-ні сабақ процесінде қолдануды үйренді.
6) Бизнес: ЖИ-ны нақты процестерге енгізу
AI Corporate – қызметкерлер мен компанияларға арналған оқыту. ЖИ-ны нөлден бастап меңгеру және оны бизнес-процестерге енгізу (автоматтандыру, аналитика, басқару тиімділігін арттыру) қарастырылған.
7) Ашық онлайн бағдарламалар: ЖИ дағдыларына қолжетімділік
QazCoders – БАӘ серіктестігімен Udacity платформасында жүзеге асырылатын бағдарлама (жасы шектеусіз).
«ЖИ негіздері: ChatGPT» – AI Sana мен Lerna бірлесіп әзірлеген курс. 4 модуль, 51 бейнесабақтан тұрады, Skillbox платформасында тегін қолжетімді. Курс нейрожеліні қолданып қазақ тіліне аударылған.
Қазақстан бойынша 19 аймақтық IT-хаб жұмыс істейді, онда кез келген адам цифрлық дағдылар мен практикалық оқытуды тегін ала алады. Онлайн форматтар тұрғылықты жеріне қарамастан оқуға мүмкіндік береді.
Бағдарламаға халықтың белсенді қатысуы оның өзектілігін растайды. Қазақстан біртіндеп ЖИ-ның жалпы қолжетімді біліктілігін қалыптастырып, цифрлық экономика үшін кадрлық қор әзірлеуде. Министрлік оқытудың практикалық мәнін күшейтіп, білім, мемлекеттік басқару және бизнес саласында нақты міндеттерге бағдарлауды жалғастырады.
