Тараз қаласында өткен форумда Ішкі істер министрлігінің, жергілікті билік органдары мен құқық қорғау мекемелерінің өкілдері криптовалютаға қатысты қылмыстарға қалай қарсы тұру керектігін талқылады. Кездесудің басты мақсаты – тәжірибе алмасу және азаматтарды цифрлық алаяқтықтан қорғаудың тиімді шешімдерін іздеу.
Ішкі істер министрінің орынбасары Санжар Әділов соңғы екі жылда Қазақстанда криптовалютамен байланысты заңсыз әрекеттер бойынша мыңнан астам іс қаралғанын хабарлады. Оның айтуынша, деректердің басым бөлігі интернет-алаяқтық, заңсыз айырбас пункттері мен ақшаны заңсыз айналымға салу схемаларына қатысты. Мұндай қылмыстардан келтірілген шығын 8 миллиард теңгеден асты.
Елде киберқауіпсіздікті күшейту мақсатында Антифрод орталығы қызмет атқарады. Бұл орталық алаяқтар пайдаланатын сайттар мен платформаларды анықтап, блоктайды. Биылдан бастап 26 мыңнан астам веб-сайтқа қолжетімділік шектеліп, 64 миллионға жуық күдікті қоңырау уақытында тоқтатылды.
Форум қатысушылары цифрлық экономиканы дамыту бақылауды күшейту және халықтың цифрлық сауаттылығын арттырумен қатар жүруі қажет деп атап өтті. Олардың пікірінше, тек мемлекет пен IT-сарапшылардың бірлескен әрекеті онлайн кеңістіктегі қауіп-қатерді азайтып, пайдаланушыларды қорғауға мүмкіндік береді.
