Ольга Ускова – Ресейдің танымал кәсіпкері, Cognitive Technologies компаниялар тобының негізін қалаушы әрі президенті. Сондай-ақ ол Cognitive Pilot компаниясының бас директоры. Бұл компания – Сбербанк пен Cognitive Technologies-тің бірлескен жобасы, ол теміржол көлігінің қауіпсіздігін арттыруға арналған ақылды жүйелерді, жүргізушісіз көліктерге арналған радарлар мен заманауи агротехниканы басқару жүйелерін әзірлейді.
Ольга Ускова бүгінде жасанды интеллект саласындағы ерекше мамандардың бірі саналады. Ол тек технологияны дамыту жолында ғана емес, сонымен қатар ЖИ-дің қоғамға, экономика мен адам өміріне әсерін зерттеуде де жетекші сарапшылар қатарында.
Сарапшылардың айтуынша, Ускованың пікірлері мен болжаулары жиі шындыққа айналып отырады. Уақыт көрсеткендей, оның жасанды интеллектінің дамуына қатысты тұжырымдары әлемдік үрдістермен үндесіп, іс жүзінде дәл келіп жатыр.
Кей сарапшылар оны «ЖИ-дің болашағын дәл болжай алған санаулы адамдардың бірі» деп атайды. Ал өзі үшін ең бастысы – жасанды интеллектінің адамға қызмет етуі, бірақ сонымен бірге оның шектен тыс дамуы адамзатқа қауіп төндірмеуін қамтамасыз ету.
