Елімізде алғаш рет жасанды интеллект саласын реттейтін ұлттық стандарттар бекітілді. Бұл қадам 2024–2029 жылдарға арналған мемлекеттік ЖИ-ні дамыту концепциясын жүзеге асырудағы маңызды жетістік ретінде бағалануда.
Қабылданған жеті стандарт әзірлеушілер, бизнес және мемлекеттік органдар үшін бірізді ережелер орнатады. Олар жасанды интеллект технологияларын жобалаудан бастап деректерді талдау, тәуекелдерді бағалау және ақпаратты қорғауға дейінгі барлық кезеңдерді қамтиды.
Стандарттарда пайдаланушылардың қауіпсіздігіне ерекше көңіл бөлінген. Жеке деректерді қорғау және ақпараттың ағып кетуін болдырмау талаптары нақты көрсетілген. Мысалы, СТ РК ISO/IEC 5339 құжаты виртуалды ассистенттер, өндірістік шешімдер мен медициналық технологиялар сияқты ЖИ жүйелерін жасау және қолданудың жалпы принциптерін айқындайды.
Ұлттық стандарттарды енгізу арқылы жасанды интеллектімен жұмыс істейтін компаниялар сертификаттан өтіп, халықаралық талаптарға сәйкестігін растай алады. Бұл отандық IT-өнімдерге сенімділікті арттырып, оларды сыртқы нарыққа шығаруға мүмкіндік береді.
Сонымен қатар, елімізде жасанды интеллект бойынша сынақтық және эталондық орталық құру жұмыстары жүргізілуде. Оның құрамында AI Standards Hub алаңын іске қосу жоспарланған, онда сертификаттау мен сынақтан өткізу жүргізіліп, ISO, ITU және ОЭСР сияқты халықаралық ұйымдармен ынтымақтастық орнатылады.
Сарапшылардың айтуынша, стандарттардың бекітілуі Қазақстанның цифрлық дамуына жаңа кезең ашады. Олар тек технологияларды реттеп қана қоймай, жасанды интеллектіні жауапкершілікпен қолдану мәдениетін қалыптастырып, елдің цифрлық трансформациясын қауіпсіз әрі тұрақты етеді.
