Қазақстанда денсаулық сақтау саласын цифрландыру ауқымды қарқынмен жалғасуда. Денсаулық сақтау министрлігі E-Densaulyq экожүйесінің архитектурасын жүзеге асыруда. Бұл жүйе қазіргі 17 ақпараттық жүйені 6 негізгі компонентке біріктірмек.
Экожүйенің негізгі тірегі – біртұтас медициналық деректер қоры. Ол азаматтардың барлық медициналық деректерін жеке меншік нысанынан тәуелсіз түрде ақпараттық жүйелер арқылы жинақтайды.
2026 жылға қарай Қазақстан азаматтары өздерінің электрондық денсаулық паспортына толық қол жеткізе алады. «Медициналық деректер әр пациентпен бірге сақталады» қағидасы медицина қызметтерін ашық әрі басқарылатын етіп ұйымдастыруға мүмкіндік береді.
Экожүйенің негізгі компоненттері:
- Халықты тіркеу регистрі
- Денсаулық сақтау ресурстарын басқару жүйесі (қызметкерлер, техника, лицензиялар есебі)
- Дәрі-дәрмекпен қамтамасыз ету ақпараттық жүйесі
- Біртұтас медициналық қызмет көрсетуді төлеу жүйесі
Айта кетейік, біртұтас төлем жүйесі осы жылдың шілде айынан бастап бүкіл елде жұмыс істеп келеді. Ол көрсетілген қызметтердің 100% мониторингін қамтамасыз етеді. Жаңа жүйеде бұзушылықтарды анықтау алгоритмдері автоматтандырылған, ал медициналық ұйымдардың шағымдары эксперттер тарапынан қашықтықтан қаралады.
Келесі кезеңде Денсаулық сақтау ресурстарын басқару жүйесі іске қосылады. Бұл жүйе кадрлар, техника және медициналық жабдықты ескере отырып, инфрақұрылымды жоспарлауға мүмкіндік береді.
Барлық IT-шешімдер үш негізгі топқа бағытталған:
Азаматтар үшін:
- 8 медициналық анықтама цифрлық форматқа ауыстырылды, оның 5-і тек цифрлық нұсқада;
- Пациенттердің 80%-і дәрілерді «Әлеуметтік әмиян» цифрлық сервисі арқылы алады;
- 3,5 млн пациентке дәрі-дәрмек қажеттілігін жеке есептеу мүмкіндігі берілді.
Медициналық қызметкерлер үшін:
- Жүйелерді біріктіру және қайталанатын әрекеттерді қысқарту арқасында персоналға түсетін жүктеме 40%-ға азайды;
- 147 медициналық ұйым телемедицинаның пилоттық жобасына қатысуда, оның ішінде ауыл тұрғындарына көмек көрсету де бар;
- 2 AI-шешім (CEREBRA.AI және WDSOFT) инсульт пен сүт безі қатерлі ісігін ерте анықтау практикасына енгізілді.
Жоспарда:
- Балалар, әйелдер және динамикалық бақылаудағы адамдардың денсаулығын цифрлық мониторингке алу;
- Дәрі-дәрмекпен қамтамасыз етуді жеке дәріханалар арқылы трансформациялау.
2024 жылдан бастап медициналық ақпараттық жүйелерде Face ID технологиясы енгізілген. Қазіргі таңда азаматтардың 57%-і тіркеуді Face ID, «Цифрлық құжат» немесе пациент коды арқылы жүзеге асырады.
Денсаулық сақтау министрлігі атап өткендей, цифрландыру – жай IT-шешім емес, ол қолжетімді, ашық және сенімді деректерге негізделген жаңа медицинаның негізі.
