Шығыс Қазақстан өңірі инновациялық және ғылымға негізделген өндірістер бойынша тұрақты өсімді көрсетіп, елдің ғылыми-техникалық прогресіндегі жетекші орынға нық қадаммен бет бұрып келеді. Аймақтың жоғары технологиялық әлеуетін дәлелдейтін жобалар бүгінде бүкіл Орталық Азия көлемінде теңдесі жоқ үлгі ретінде қарастырылады.
Өскемендегі «Ульба-ТВС» зауыты – Қазақстан тарихындағы алғашқы ядролық отын шығаратын кәсіпорын. Францияның Framatome технологиясы негізінде салынған бұл зауыт жылына 200 тонна уран өңдей алады. Мұндай өндіріс тек Қазақстан үшін ғана емес, бүкіл өңір үшін ерекше жетістік саналады.
Дарын Сәрсенұлы атындағы ШҚТУ ғылымды коммерцияландыру бағытында ірі жобаларды жүзеге асырып жатыр. Университеттің өнеркәсіптік серіктестерімен бірлескен жұмыстары «Ғылым қоры» мен Дүниежүзілік банк тарапынан қаржыландырылуда.
Мәселен, ШҚТУ академик Н.Д. Батпанов атындағы травматология және ортопедия ұлттық ғылыми орталығымен бірлесе отырып, отандық медициналық импланттар мен құралдарды жасап шығаруда. Қазіргі таңда алты түрлі имплант клиникалық сынақтан өтуде.
Сондай-ақ, онкологиялық аурулар кезінде сүйек құрылымдарын қалпына келтіруге арналған титан ұнтағынан жасалатын жеке импланттар әзірленіп жатыр. Бұл бағытта университет Қазақ онкология және радиология институтымен тығыз жұмыс жүргізуде.
ШҚТУ майлы дақылдарға арналған сұйық тыңайтқышты тамыр жүйесіне енгізетін отандық егіс кешенін құруды қолға алды. Жоба Қостанайдағы зауыт және майлы дақылдар тәжірибелік шаруашылығымен бірлесіп жүзеге асуда. Бұл — ауыл шаруашылығы саласындағы импортқа тәуелділіктен арылудың алғашқы қадамы.
Университет пен «Astana Motors Manufacturing Kazakhstan» компаниясы өзара ынтымақтастық туралы меморандумға қол қойды. Бұл келісім аясында студенттер мен мамандар автозауыттың болашақ қызметкерлеріне арналған 3D-модельдеу, сканерлеу және құжаттаманы әзірлеу бағытында оқытылады.
ШҚТУ «Композициялық материалдар институтымен» бірге өндірістік қалдықтарды құрылыс материалдарына айналдыру жобасын қолға алды. Бұл бастама экологиялық зиянды азайтып қана қоймай, ішкі нарыққа бәсекеге қабілетті өнім шығаруға жол ашады.
Ал тау-кен металлургия кешені саласында цифрландыру үдерісі қарқын алуда. Аймақта «IndustrialAI» құзыреттер орталығының аясында жасанды интеллект жүйелері әзірленуде. Бұл технологиялар металлургия кәсіпорындарының шығындарын азайтып, өнім сапасы мен өндіріс тиімділігін арттыруға мүмкіндік береді.
