Алматы қаласындағы «Алатау» ақпараттық технологиялар паркі» арнайы экономикалық аймағында Freedom Cloud деректерді өңдеу орталығының құрылысы ресми түрде басталды. Жоба еліміздің цифрлық инфрақұрылымын дамытуға, технологиялық тәуелсіздігін нығайтуға және халықаралық IT-компанияларды тартуға бағытталған. Бұл туралы digitalbusiness.kz хабарлайды.
Құрылысқа салынатын жалпы инвестиция көлемі – 175 млрд теңге:
Бірінші кезеңге – 40 млрд теңге;
Екінші кезеңге – 35 млрд теңге;
Серверлік қуаттарды орналастыруға – 100 млрд теңге көзделген.
Іс-шараға ҚР Цифрлық даму, инновациялар және аэроғарыш өнеркәсібі министрі Жаслан Мәдиев, Freedom Holding Corp. компаниясының бас директоры Тимур Турлов және Алматы қаласы әкімінің орынбасары Әлішер Әбдіқадыров қатысты.
Министрдің айтуынша, дата-орталықтар құрылысы — Қазақстанның заманауи цифрлық инфрақұрылымын қалыптастыруға бағытталған мемлекеттік стратегияның бір бөлігі.
«Бұл нысандар мәліметтерді қауіпсіз сақтап, жылдам өңдеуге мүмкіндік береді. Сонымен қатар олар жаһандық ақпараттық экожүйенің маңызды бөлігіне айналады. Біз халықаралық цифрлық процестерге белсенді араласу арқылы еліміздің бәсекеге қабілеттілігін арттырғымыз келеді. Дата-орталықтар IT-нарықтың дамуын жеделдетіп, бизнес пен азаматтар үшін жаңа мүмкіндіктерге жол ашады», – деді Жаслан Мәдиев.
Freedom Cloud жобасы аясында 480 серверлік сөре орнату жоспарланған. Әрбір сөренің қуаты – 15 кВт. Жалпы IT-қуаттылығы – 7,2 МВт, ал толық электр тұтыну көлемі (салқындату және резервтік жүйелермен бірге) – 13 МВт .
Орталық халықаралық сенімділік пен энергия тиімділігі стандарттарына сай салынады. Сонымен қатар ол Еуразия кеңістігіндегі цифрлық хабқа айналуды көздейтін Қазақстанның цифрландыру саясатының бір бөлігіне айналады. Жоба Еуропа мен Қытай арасындағы деректер алмасуға арналған баламалы транзиттік арнаны да қамтиды.
Сергей Никитин, DigitalBusiness
