Техникалық тұрғыдан жаңашыл шешімдермен жабдықталған Verge электр мотоциклі 24 сағат ішінде 1366 шақырымды бағындырды. Компания бұл сынақты күрделі әрі шынайы жағдайларда өткізген.
Мотоциклдің бағыты Монакодан басталып, Мадридке дейін созылды. Жол бойы Францияның бұралаң таулы өңірлері, Андорра асулары мен Испанияның төбелі аймақтары кездесті. Көлік көбіне жоғары жылдамдықты автобандармен жүріп, қуаттың тез таусылуына әсер етті. Дегенмен, команда орташа жылдамдықты 100 км/сағат деңгейінде ұстап отыруға тырысты.
Verge электр мотоциклі толық қуатпен шамамен 250 шақырымды жүріп өтеді. Сынақ кезінде құрылғының нақты қанша рет қуатталғаны туралы мәлімет берілмегенімен, бүкіл сапардың ұзақтығы 24 сағаттан аспағаны анық. Бұл уақыттың ішіне қозғалыс пен қуаттандыру да енген. Айта кету керек, мотоцикл небәрі 35 минутта 80 пайызға дейін қуатталады. Ал қолайлы жағдайда, сағатына 200 шақырым жылдамдықпен жүре алады. Осы техникалық артықшылықтар сапарды тиімді жоспарлап, уақытты үнемдеуге мүмкіндік берген.
Verge электр мотоциклі өзіндік ерекше құрылымымен де назар аударады. Оның артқы доңғалағы түйінсіз, ортасы қуыс. Қозғалтқыш доңғалақтың шеңберіне тікелей орнатылған. Мұндай конструкция мотоциклдің салмағын жеңілдетіп, механикалық бөлшектердің санын азайтып, техникалық қызмет көрсету шығындарын төмендетуге мүмкіндік береді.
Компания бұл үлгіні биылғы жылдың үшінші тоқсанында жаһандық нарыққа шығаруды жоспарлап отыр. Бастапқы бағасы — 29 900 АҚШ доллары.
