Ұлыбританияда миллионнан астам жас қазір не оқымайды, не жұмыс істемейді. Бұл жағдай тек экономикалық мәселелермен ғана емес, сонымен бірге жастардың психологиялық ахуалымен, әлеуметтік желілердің ықпалымен және өмірге қойылатын талаптардың артуымен тығыз байланысты.
Соңғы жылдары TikTok және басқа әлеуметтік желілерде жұмыссыздық туралы жеңіл әзілге толы бейнероликтер танымал бола бастады. Кейбір видеолар еңбекке деген немқұрайлы көзқарас қалыптастырып, жастар арасында жұмыссыздықты қалыпты жағдай ретінде қабылдауға әсер етуде. Онымен қоса, ресми деректер жағдайдың күрделілігін көрсетеді: бүгінде Ұлыбританияда 16-24 жас аралығындағы 789 мың жас еңбек нарығынан тыс қалған. Бұл – соңғы он жылдағы ең жоғары көрсеткіш.
The King’s Trust қорының мәліметінше, әр бесінші жас психологиялық қиындықтар салдарынан оқуға немесе жұмыс істеуге қауқарсыз. Пандемияның әсерінен ұзақ мерзімді аурулар саны күрт өсті. Мысалы, 2021-2022 жылдары 63 мың түлек оқуын аяқтағаннан кейін бірден денсаулығына байланысты демалыс алған.
Әлеуметтік желілердегі мінсіз өмірдің жасанды көрінісі жастарға елеулі түрде қысым жасап, олардың өзіне деген сенімін төмендетеді. Мысалы, үй сатып алу немесе қаржылық тұрақтылық секілді негізгі мақсаттар көптеген жастар үшін қол жетпес арманға айналған. Мұндай түңілушілік еңбекке деген ынтаның төмендеуіне алып келеді.
Жастарды еңбек нарығына ертерек тарту – бұл мәселені шешудің басты қадамдарының бірі. Жасөспірімдерге жұмыс істеу мәдениетін қалыптастыру, қаржылық тәуелсіздікке баулу және өмірлік мақсаттарына бағыттау маңызды. Сонымен қатар, еңбек нарығында әділетті жүйе құру жастардың жұмысқа деген сенімін арттырады.
Егер қоғам мен мемлекет жастарға қолдау шараларын күшейтіп, әлеуметтік желілер мен шынайы өмір арасындағы алшақтықты азайтса, жұмыссыздық деңгейін төмендетуге және жаңа буынның болашаққа деген сенімін нығайтуға мүмкіндік пайда болады.
