Соңғы жылдары Қазақстанда байланыс қызметтерінің бағасы едәуір өсті. 2026 жылдан бастап Қазақстан Республикасы Президентінің Стратегиялық жоспарлау және реформалар агенттігіне қарасты Ұлттық статистика бюросы тұтыну бағаларын есептеу тәртібіне де өзгеріс енгізді. 2025 жылға дейін ұялы байланыс қызметтерінің бағасы жеке көрсеткіш ретінде есептелсе, биылдан бастап ол мобильді байланыс қызметтерінің кеңірек санатына енгізілді. Осыған байланысты жекелеген көрсеткіштерді алдыңғы жылдардағы деректермен тікелей салыстыру мүмкін емес.
2020 жылғы шілдеде ұялы байланыс қызметтерінің бағасы бір жыл ішінде 1,7 пайызға өсті. 2021 жылы бұл көрсеткіш 1,9 пайыз, 2022 жылы 2,4 пайыз, 2023 жылы 5,7 пайыз, 2024 жылы 21,9 пайыз болды. 2025 жылы байланыс қызметтері тағы 7,1 пайызға қымбаттады. Ал 2026 жылғы шілдеде мобильді байланыс қызметтерінің бағасы 7,6 пайызға өсті. Қоңырау шалуға арналған минуттар, интернет пен SMS кіретін тарифтік топтаманың ай сайынғы абоненттік төлемі 10 пайызға қымбаттаған.
Бағаның өсуі жекелеген тарифтік жоспарлардан да байқалады. 2026 жылғы 15 қаңтардан бастап Beeline кейбір мұрағаттық тарифтердің абоненттік төлемін өсірді. Бұл ретте тарифке кіретін гигабайттар мен минуттар көлемі өзгерген жоқ. Tele2 17 шілдеден бастап «Выгодный 3» тарифінің құнын 4,4 мың теңгеден 5,2 мың теңгеге дейін көтерді. Бұл 18,2 пайыздық өсімге тең. Сонымен бірге тарифтік топтама кеңейтілді. Kcell 2025 жылдың көктемінде бірқатар тарифтердің абоненттік төлемін көтеруді жоспарлаған еді. Алайда клиенттердің өтініштерін ескеріп, танымал он тариф бойынша бағаны өзгертуден бас тартты.
Осы тұста Халықаралық электр байланысы одағының (ITU) халықаралық салыстыруы назар аударуға тұрарлық. 2025 жылдан бастап мобильді байланыс қызметін көп тұтынатын пайдаланушыларға арналған стандартты топтамаға 140 минуттық қоңырау, 20 SMS және 5 ГБ интернет кіреді. Қазақстанда мұндай топтаманың 2025 жылғы айлық құны 11,8 АҚШ долларын құрады. Өзбекстанда бұл көрсеткіш 2,3 доллар, Қырғызстанда 2,9 доллар, Тәжікстанда 7,2 доллар болды. Орталық Азия елдері арасында Қазақстаннан жоғары көрсеткіш тек Түрікменстанда тіркелді. Онда стандартты топтаманың құны 51,4 доллар болды. Осылайша Қазақстандағы байланыс топтамасы Өзбекстандағыдан 5,1 есе, Қырғызстандағыдан 4,1 есе қымбат болған.
Әлем бойынша медианалық көрсеткіш 14,5 долларды құрады. Демек, номиналды бағамен есептегенде Қазақстан бұл деңгейден төмен тұр. Алайда елдердегі өмір сүру құнының айырмашылығын ескергенде жағдай өзгеше көрінеді. Сатып алу қабілетінің паритеті бойынша Қазақстандағы аталған топтаманың құны 34 халықаралық долларға бағаланған. Әлемдік медианалық көрсеткіш 26,8 халықаралық долларды құрады. Яғни халықтың сатып алу қабілетін ескергенде Қазақстандағы мобильді байланыс қызметтерінің стандартты топтамасы әлемдік медианадан 27 пайызға қымбат болған.
Дереккөз: ranking.kz
Қосымша материалдар мен сараптамалық шолуларды біздің Telegram арнамыздан оқуға болады.
